Foredrag: Fedre og sønner av Dag Steinfeld
Ålesund bibliotek inviterer til føredrag med forfattar og advokat Dag Steinfeld. Her vil han presentere boka si Fedre og sønner, som er ei dramatisk forteljing om fire generasjonar i varm og kald krig.
Dag Steinfeld høyrde forteljingar om den jødiske familien sin på farssida frå han var liten. Dei hadde flykta frå fattigdom og forfølging i Russland på 1800-talet og etter kvart etablert seg med fleire forretningar i Noreg. Seinare døydde mange av dei i Auschwitz. Då Dag bestemmer seg for å undersøkje fortida, avdekkjer han ei eventyrleg klassereise og stor rikdom, men også kraftige konfliktar. Gjennom to verdskrigar, økonomiske krisetider og kald krig står fedrar og søner mot kvarandre i familien. Han har sjølv stått i ein slik konflikt med far sin. Men dette er også ei historie om vennskap, samhald og kjærleik. Kom på Ålesund bibliotek og høyr ei gripande forteljing om dei siste hundre åra i Europa – slik éin familie har opplevd dei.
Føredraget er gratis og ope for alle.
Arrangementet er ein del av arrangementsrekka Jødiske familiar i krig og fred, og er støtta av Fritt Ord.
