Utstillingsopning: PELSTID

Velkomen til opning av utstillinga PELSTID – ei utstilling om norsk pelsdyravl si om lag 100 år lange historie, med utgangspunkt i lokale forhold her på Sunnmøre.

I 2025 vart pelsdyrnæringa avvikla i Noreg. Bøndene på Sunnmøre var pionerar dei første tiåra og har vore med heilt til næringa vart forbode.

Spora etter næringa kan vi framleis sjå i landskapet, hos menneska som jobba i næringa, i klesskapet, på bilete og i arkiv. Ho er ein del av den immaterielle kulturarven på Sunnmøre.

Utstillinga baserer seg på forsking, aktivt innsamlingsarbeid, dialog med lokale bønder, andre med tilknyting til næringa, Borgund vidaregåande skule og samarbeid i det nasjonale museumsnettverket.