Kulturkafé med vokalgruppa Røyst og gitarist Ketil Strand

Denne laurdagen byr vi på den kanskje største spennvidda i kulturkaférekkja vår så langt!

Vokalgruppa Røyst, som får starte ballet med to sett, vart etablert våren 2017 og består av Ingeborg Singsdal, Tuva Vaage Brådalen, Anne Berit Jordal og Vilde Sollid Brandal. Røyst kan beskrivast som ei allsidig vokalgruppe. Med eit repertoar som spenner frå folkemusikk til pop, der musikken framførast a cappella, skapar dei dynamiske, nære og stemningsfulle framføringar. Vokalgruppa er oppteken av klang og komplekse vokalharmoniar. Røyst er ei gruppe som ønsker å engasjere publikum med energi og musikalitet og jobbar aktivt med å utforske nye måtar å fortelje historier på gjennom songen. Ketil Strand er gitarist og gitarlærar ved Ålesund kulturskole. I tillegg til ei aktiv karriere som bandmusikar i Ålesund og omegn, har han gjennom mange tiår vore ein mykje brukt frilansmusikar i mange ulike samanhengar. Han omtalar seg sjølv som ein musikalsk potet. Han syslar og med eigne soloprosjekt og har gjeve ut fire soloalbum med eigenkomponert instrumentalmusikk inspirert av mange ulike sjangrar. Kaféen opnar 12:30, og så spelast musikken i fire bolkar på ca 20 minutt frå klokka 13. Bill. kr 100,– inkl ein kaffe eller te.

Gratis for alle under 18.